Թղթեր

Զքրիստոսազգեաց եւ զխաչակրօն սրբազան անձնացելոյդ անձին թաղկվարս խռուացելոյդ հերով, որ զօրէն Յովհաննու շատացեալ մարմնական պիտոյիւք, զքոյդ մաքրափայլ աջոյ վերծանեալ զտառ: Յոյժ ըղձաւէտ փափագմամբ լուծանէր զիմն խնդիր մանաւանդ եթէ զտենչանս նախ առն սրբազանից հարց լնոյր զիղձն: Եւ յայսմ ծանեալ, եթէ տակաւին տոկաս ի քումդ պատանական կենցաղում, որ սակս Յիսուսի այրականին սերտութեան հետեւեալ շաւղաց. յիրաւի ուրեմն ի գլուխն հայելով քեզ յայն, որ փոխանակ ուրախութեանն, որ նմա առաջի կայր, յանձն առ զխաչն, անարգեաց զամօթն եւ նստաւ ընդ աջմէ մեծութեան Աստուծոյ:

Վասն որոյ որ զփորձն առեալն է, կարող է փորձանաւորացն օգնական լինել, զոր աղաչեմք հանդերձ պաղատանօք առ այն, որ առ լաւութեանն իւրոյ լսելի լինէր, զի օգնական լիցի քեզ ի քումդ հանդիսի մրցանաց, եւ աղօթիւք քո պահպանեսցէ զմեզ:

Այլ թէ պարտ է սուղ ինչ ըստ մերում սովորական մակացութեան իմաստասիրել, փոքր ինչ մակագրել քեզ յայսմ տառի, զի թերեւս սխրացեալ զուարճասցիս: Բանս ոչ կամի զքեզ ջըջնի յորջորջել. վասն զի ջատագով ջայլեաց գաղափար հարանցն կոչի այն, որք յաւէժաբարն անուանին: Այլ կամիմ զքեզ խռուացեալ հերովք եւ թաղկեալ վարսիւք ըստ օրէն, զոր Գրիգորն յիւրում ներբողական աստուածաբանութեանն արժանի գովեստի վարկանի, ըստ Եղիայի յանձաւին գիսաւորեալ մաշկեաւն եւ ըստ ամլածին Յովհաննու: Այս րար եւ ըստ այլոց: Բայց ինձ հերք քո` ըստ որում հօրանք այծեաց, որ շրջին ի Գաղգաղայ, զառաքինութեանցն ծայրութիւն թուի ինձ ցուցանել եւ զմեռելութիւնն ի դուզնաքեայ կենցաղումս: Զայսոսիկ տարացոյց քոյդ խռուցեալ հերաց, իսկ մաշկեակդ զնախահօրն ստանձնեալ զանիծադրութեան կնիք, ջնջելով զնա մանաւանդ թէ զՏարսօնացւոյն փողոյ լնլով զօրէնս. ըստ որում լեշկ մաշկեօք եւ մորթովք այծենեօք զքոյդ սերէ նշանակէր յատկութիւն տեսակի, զհաւատոցն ստուգութեան առնոյր վկայութիւն: Եւ այս այսքան: Այլ գիտեմք, զի յօժարութիւն սրտիդ ստիպէ զքեզ առ մեզ գալ, այսպէս եւ զմեզ գիտասցես, զի սիրով ընկալայց զքեզ. ողջ լե'ր: