Պատմութիւն Հայոց

ԳԼՈՒԽ Զ
Յաղագս Քամայ:

Քամ ծնանի զՔուշ. Քուշ ծնանի զՄեստրիմ. Մեստրիմ ծնանի զՆեբրովդ: Ի նորա ժամանակս եղեւ սկիզբն թագաւորութեան նոցա ի Բաբելոն: Եւ թագաւորեաց Նեբրովդ ի Բաբելոն` եւ այլոց քաղաքաց` որք են այսոքիկ. Որիդ, եւ Աքար, Քաղնանէ` յերկրին Սէնայար: Յերկրէն յայնմանէ ել Ասուր, եւ շինեաց զՆինուէ եւ զՌուովթ քաղաք, եւ զՔաղան, եւ զԴասեման, եւ ի մէջ Նինուէի եւ ի մէջ Քաղանայ` ա'յն է քաղաք մեծ: Նեբրովդն այն առաջին սկսաւ լինել սկայ ի վերայ երկրի. եւ նա էր որսորդ առաջի Տեառն Աստուծոյ: Նեբրովդ ծնանի զԲաբ. Բաբ ծնանի զԱնեբիս. Անեբիս ծնանի զԱրբէլ. Արբէլ ծնանի զՔաաղ. Քաաղ ծնանի զմիւս Արբէլ. Արբէլ ծնանի զՆինոս. Նինոս ծնանի զՆինուաս: Իսկ ի Մեստրասայ ծննդոցն բազում ազգք բաժանեցան. Ողոդիմացիք եւ Սենիմացիք, եւ Սաղբիմացիք, եւ Նեփթաղիմացիք, եւ Պարոսնիմացիք, ուստի ելին Փղշտացիք եւ Կափթորիմացիք: