Պատմութիւն Հայոց

ԳԼՈՒԽ ԽԸ
Դարձեալ վասն Խոսրովու:

Ի ժամանակս թագաւորութեանն Խոսրովու արքային Հայոց մեծաց` բարձեալ լինի թագաւորութիւնն Պարսից ի Պարթեւաց յամս տէրութեանն Փիլիպոսի կայսերՀռոմայեցւոց: Եւ զսոսա ասեն լեալ յԱբրահամեան զաւակէն` որ ի Քետուրայ. զորս ի կենդանութեան իւրում Աբրահամ մեկնեաց յԻսահակայ զծնունդն Քետուրայ զԷմրան եւ զեղբարս նորա. եւ արձակեաց յերկիրն արեւելից: Յորոց սերեալ ի նոցանէ ազգ`Պարթեւք անուանեցան. եւ սկիզբն առնու թագաւորելոյ նոցա ըստ հաստատելոյ բանին Տեառն` որ առ Աբրահամ, եթէ թագաւորք ազգաց ի քէն ելցեն. եւ թագաւորեն Պարսից եւ Հայոց: Արդ թագաւորէ Պարսից Արշակ քաջ. սա ապստամբ ելեալ ի Մակեդոնացւոց թագաւորէ` ի քաղաքին`որ կոչի Բահղառ, յերկրին Քուշանացւոց: Յետ վաթսուն ամի մահուանն Աղէքսանդր Մակեդոնացւոյ` թագաւորէ ամս երեսուն եւ մին. եւ յետ նորա Արտաշէս` որդի նորա`ամս քսան եւ վեց. ապա Արշակ` որդի Արտաշէսի` որ կոչեցաւն մեծ, որ եսպան զԱնտիոք` զորդի Սեղեւկեայ, եւ զՎաղարշակ զեղբայր իւր թագաւորեցոյց Հայոց`երկրորդ իւր առնելով: Այս միանգամ ասացեալ եղեւ իսկ զբան մերոյ գործառնութեանս: Արդ կալեալ Պարթեւք զթագաւորութիւնն Պարսից` կարգ ըստ կարգի որդի ի հօրէ առնլով` ամս ՆԾԵ` մինչեւ բարձաւ թագաւորութիւնն նոցա: