Յիշատակարան. Մասն I (1763-1767)

Վարդապետացն մերոց անդ ՚ի Պօլիս եղելոց սրբոյ Աթոռոյս հարազատից, հոգացեալ յԱրքունուստ անտի զֆերմանսն18) եւ զբէրաթն19) որք վասն սրբազան Վեհիս մերոյ, նաեւ հոգացեալ ՚ի ժողովրդականաց անտի զբազմակնիք մահսար, դարձուցեալ էին սոքօք զԳրիգոր վարդապետն գալ ՚ի սուրբ Աթոռս (որ յանցելումն ամի զմահսարն միաբանից սրբոյ Աթոռոյս որ վասն սրբազան Վեհիս մերոյ Հայրապետութեան, առեալ գնաց ՚ի Պօլիս ընդ Յարութիւն վարդապետին որպէս ՚ի սկզբան անդ ասացաւ): Որոյ ելեալ ՚ի Պօլսոյ եւ յԵւդոկիայ ժամանեալ, առաքէ նախ քան զինքն ՚ի Կարին, զի Պարոն Մելքոնն ՚ի սուրբ Աթոռս հասուսցէ, իսկ ինքն մնայ յետս, զի կնքեցուսցէ զմահսարն ՚ի Քաղաքսն, յորս հանդիպեսցի ՚ի գալն: Ուստի` եկեալ ժամանեցին ֆերմանքն եւ բէրաթն ՚ի սուրբ Աթոռս ՚ի ձեռն Մխիթար փայեկին ՚ի Փետրվարի ԺԲ: Ընդ որոց էին եւ թուղթք ՚ի Պօլսոյ ՚ի յԱբրահամ վարդապետէն եւ յայլոց ոմանց (որոց ոչ գրեցան այժմ պատասխանիք): Այլ եւ ՚ի Կարնոյ` ՚ի Պարոն Մելքոնէն եւ յայլոց ոմանց վասն բազում իրակութեանց, գլխաւորապէս վասն ընչից Եսայի վարդապետին` (զնմանէ ասացաք ՚ի Յունվարի ԻԳ. ՚ի թղթոջ Տէր Պետրոսին) զի փեսայ Եսայի վարդապետին Կարապետ Քահանայն` այնոքիւք զորս սրբազան Վեհըն գրեաց յայնժամ տալ նմա իբր ողորմութիւն ո'չ շատանայր, եւ զինչսն ո'չ յօժարէր տալ: Վասն որոյ եւ սրբազանն գրեաց պատասխանի սոցին, որք են այսոքիկ:

Թուղթ ՚ի Պօլիս առ Աբրահամ վարդապետն, պատասխանի թղթոյ նորին, վասն ֆերմանացն հասման եւ այլ իրակութեանց:

Եւ ՚ի Կարին,

Թուղթ առ Կարնոյ Առաջնորդ Պաղտասար վարդապետն եւ գլխաւոր իշխանսն, որոց նախ յանդիմանութիւն վասն ոչ լինելոյն վրէժխնդիր լրբութեանց երիցուն, եւ ապա հա'րկ` զի առցեն ՚ի նմանէ զինչսն եւ ՚ի սուրբ Աթոռս յղեսցեն: Եւ թէ էրէցն ո'չ տայցէ, ընդ բանիւ եղիցի եւ ՚ի կարգէն լուծցի: Ըստ սմին:

Թուղթ եւս առ Մելքոն Աղայն: Այլ եւ վասն Եւդոկիոյ նուիրակ Զաքարիայ վարդապետին (որ աւարտեալ զգործն եկեալ էր անդ, եւ ՚ի սուրբ Աթոռս էր գալոց), զի հոգացեալ զբանսն փութով յայսկոյս ուղեւորեսցէ: Եւ թէ զքանի մի հատ լօք ուղտս առցեն: Որպէս եւ ՚ի Դեկտեմբերի Ը. գրեցաք: Եւ այլք բանք: Յաղագս այսոցիկ, Թուղթ եւս առ Զաքարիայ վարդապետն:

Զորս ՚ի ձեռն նոյն Մխիթար փայեկի յղեցաք ՚ի Փետրվարի ամսոյ տասն եւ իննումն:

Օրինակ որոց ոմանց տեսցի ՚ի մեծ տետրոջն, ՚ի թղթահամարն ՃՂԵ, ՃՂԸ: