Նամակներ (1884-1915)

260. ԿԼԱՐԱ ԶՕՀՐԱՊԻՆ

[Վիշի, 10 սեպտեմբեր, 1912], Երեքշաբթի առտու

Անուշիկ, մէկ հատիկ, շէքէրլի կնիկս,

Երէկ գիշեր Casinoէն [1] դառնալուս հեռագիրդ առի. կարծեցի որ նորէն սենեակիս մէջ ձայնդ կը լսեմ կոր. շիտակը այդ ձայնին ալ պէտք ունէի, վասն զի դուն գացիր` ուղուրս ալ գնաց. թէ՛ Էքս լէ Պէն թէ՛ հոս բոլոր վաստկածներս երէկ գիշեր կորսնցուցի. մեծ guigne [2] մը. բայց տէրտ մի ըներ. վաստկածներս միայն տուի, բայց որովհետեւ խել մը աւելորդ ծախքեր ըրեր էի, վաստկած եմ ըսելով, անոր համար խաղնիս կը սեպուի:

Ասոնք քեզի գրելու պէտք չունիմ. սիրտս նեղանալուն կը գրեմ կոր: Դուն հոգդ մի՛ ըներ. ես այս կորուստները կը հանիմ:

Այս առտու գացի bain à air chaud [3] ըսուածը ըրի, յետոյ ըլըխ ջուրի douche [4] մը, յետոյ eau de Cologne friction մը: Գոհ մնացի: Քանի մը օր պիտի ընեմ. տաք պաղ երթալու պէս բան մը: Միայն ամեն օր չ՚ըլլուիր. հոգնեցուցիչ է. երեք օր մը գոնէ արա տալու է. յետոյ 10-12 հատէն աւելի չ՚ըլլուիր կարծեմ: Իմ զգացածս:

Bain à air chaud ըսուածն ալ, ինչպէս դուն ըսեր էիր, մեր թօնիրն է. կը հանուեցնեն, մինչեւ վիզդ գոց սնտուկի մը մէջ կը դնեն կոր` տաք օդով լեցուն: Ուզես չուզես` կը քրտնիս կոր: Այս քրտնիլը` 4 ֆռանքի, շատ աժան երեւցաւ ինծի, վասն զի casinoին մէջ ճիշդ հազար անգամ աւելի սուղ այսինքն` 4000 ֆռանքի կը քրտնին կոր:

Կատակը մէկդի. կարծեմ թէ այս traitmentէն շատ ջուր խմելն աւելցնեմ նէ` վրան քիչ մը օգուտ պիտի քաղեմ:

Աղէկ միտքս ինկաւ. Կիւլպէնկին հետ կը խօսէի կոր, անիկա ինծի ըսաւ թէ այս հիւանդութեան միւս գործը շատ կը վնասէ եղեր: Եթէ իրաւցնէ վաղը բժիշկը un petit [5] (1 ֆր. ) ընելու համար գայ նէ` պիտի հասկնամ: Ալ ամեն բանի լրումն է: Ուզածդ կերակուրը ուտել չի կայ, ուզածդ ըմպելիքը խմել չի կայ, ուզածդ սիկառդ ծխել չի կայ… ուզածդ կնկան հետ պառկել չի կայ… Ասոր ի՞նչ կ՚ըսեն: Ապրել կ՚ըսե՞ն արդեօք:

Իշտէ քեզի զուարճացնելու համար խօսքեր եւ հետն ալ պաչիկներ`

Գ. ԶՕՀՐԱՊ