Տարեգիրք

Ի թուին ՇԻԵ [525=1076] թագաւորեաց Վօտանիտն, եւ էառ զկին Միխայլին վաւաշոտ պոռնկութեամբ։ Ի սոյն ժամանակի էր դուքս ի մեծն Անտիոք, իշխանն Պալհաւունի Վասակ, որդի Գրիգորի Մագիստրոսի. եւ յաւուր միում մինչ անցանէր ընդ փողոցս ճանապարհին, գային Բ կօնդօռատք յերկրպագութիւն նորա, եւ թուղթս ինչ մատուցանէին առ նա, եւ նա խոնարհեալ առնուլ զթուղթն, եւ նոքա ուրագաւ զարկին յաջ մէջսն եւ սպանին զնա։ Եւ այսպէս սպանաւ քաջն Վասակ ի պեղծ արանցն։ Եւ ամենայն զօրքն ժողովեցան ի կլայն Անտիոքայ, եւ կոչեցին զՖիլառտոսն եւ ետուն զԱնտիոք ի ձեռս նորա. իսկ Ֆիլառտոսն ժողովեաց զնենգաւորսն, որ էին ազգաւ Յոյնք, իբրեւ այրս ԷՃ [700] եւ պատճառէր ուրեք գնալ. եւ տարեալ զնոսա ի գեօղ մի որ կոչի Ափշուն, եւ սուր ի վերայ եդեալ կոտորեաց զամենե/53ա/սեան, եւ էառ ի նոցանէ զվրէժ արեան քաջին Վասակայ. եւ բռնակալեաց ի վերայ Անտիոքայ։ Ի սոյն ժամանակի սպանաւ Պեխտն, իշխանն Հայոց, այր քաջ, ի տանէն Շիրակայ. եւ թագաւորն Յունաց բռնակալեաց զնա եւ ետ մկրտել Յոյն, վասն բազում սիրոյն որ առ նա, եւ վասն քաջութեան նորա։ Սա հիւանդացաւ ի բերդն իւր, որ կոչի Անդրիուն. եւ էր նմա Յոյն աբեղայ կարգեալ ի թագաւորէն, հայր խոստովանութեան, որ առ նմա բնակէր։ Իսկ անօրէն աբեղայն յաւուր միում մտեալ առ Պեխտն, եւ գտեալ զնա միայն զի ննջէր ի մահիճս իւր քաղցրիկ, առեալ բարձ եդ ի վերայ բերանոյ նորա, եւ անկեալ ի վերայ խեղդէր զնա։ Եւ գիտացեալ զօրացն նորա զմահն, առեալ զաբեղայն տանջեցին չարաչար եւ գահավէժ արարին վերուստ ի վայր ի կլայէն, եւ սատակեցաւ անդ։ Իսկ թագաւորն Վօտանիտն մի ամ կալաւ զթագաւորութիւնն, եւ զղջացաւ յոյժ եւ նեղէր ի խղճէ մտաց իւրոց վասն Միխայլին. ապա նստուցանէր /53բ/ յաթոռն զՄելեսիանոսն, եւ ինքն կրօնաւորեցաւ։