Տարեգիրք

Իսկ ի թուին ՉԻ [720=1271] յամսեանն յունուարի Զ-ն, օծին թագաւոր Հայոց զԼեւոն որդի թագաւորին Հեթմոյ, ի մայրաքաղաքն Տարսոն ի սուրբն Սոփի, եւ յամենայն ազգաց քրիստոնէից անդ հաւաքեալ կային առ ի տեսանել զարժանի տեսանելոյ ուրախութիւնն, որ եւ բազմաց մեծութիւն շնորհեցաւ յօրն յայն, եւ բազումք ի կապանաց բանտից ազատեցան։ Եւ յետ աւուրց ինչ յորժամ արձակեցաւ ժողովն, ինքն նորընծայ թագաւորն գնայր ի Սաւրիա առ ի տեսութիւն գաւառին, եւ դարձեալ գայր ուրախութեամբ ի տուն իւր։ /178բ/ Ի սոյն ամի դարձեալ շարժեցաւ սուլտանն Եգիպտոսի, Պեկպարս Պնտուխտարն, առ ի մտանել յերկիրն Կիլիկիոյ։ Եւ թագաւորն Լեւոն հրեշտակութիւն առաքեալ առ նա՝ դարձոյց յաշխարհն իւր յԵգիպտոս, եւ ինքն թագաւորն գնաց յարեւելս առ խանն Ապաղա, եւ խանն շնորհեաց նմա արս բիւրս Բ [20. 000] զի առեալ դարձցի յաշխարհն իւր առ ի պահպանութիւն նմա, եւ ապա զկնի ամսոց ինչ ինքն խանն եկեսցէ. եւ թագաւորն Լեւոն առեալ սակաւս ի նոցանէ՝ դարձաւ յաշխարհն իւր։ Ի սոյն ամի թագաւոր ոմն ֆռանգ Ըռէտուարտ անուն, եկն նաւօք ԲՌ [2000] արամբք ի յԱքքա, ֊ անդ զտեղի առեալ մնայր այլ թագաւորաց ընկերակցաց իւրոց։ Ի սոյն ամի յամսեանն հոկտեմբերի ծնաւ արու մանուկ թագաւորին Լեւոնի ի Մսիս քաղաք եւ ուրախացան ընդ ամենայն տեղիս տէրութեան նորա։