Տարեգիրք

Ի թուին ՇՀԴ [574=1125] ասպասալարն Պարսից Բրզուխն գայր բազում զօրօք եւ իջանէր ի վերայ Ազզուն, արհամարհելով զզօրսն /102ա/ քրիստոնէից, եւ կանգնեաց ԺԲ բաբան եւ նեղէր զնոսա, եւ փորեալ ընկէց զբ պարիսպն։ Եւ յայնժամ հասանէր թագաւորն Երուսաղեմի ԼՌ [30. 000] մարդով, եւ իջանէր ի Կուրիս, եւ այրուձի պատրաստութեամբ գնացեալ մտին ի յԱզազն , եւ յայնժամ դարձաւ Բրզուխն զօրօքն, եւ եկն ի յԱզազ. Գ օր պատեալ զնա եւ նեղէր, եւ կային ի մեծ վտանգի ոչինչ ճաշակելով։ Ապա խորհեցաւ թագաւորն եւ ասէ ցիշխանսն. եկայք ելցուք դիմօք ի Թերեպն կարծիս տալով թէ ի փախուստ գնամք, զի որք ի դարանի կան ի նոցանէ՝ յարիցեն զկնի մեր եւ մեք յայնժամ դարձցուք ի վերայ նոցա անուամբս Աստուծոյ, եւ պատուէր ետ ի յԱզազն եւ ասաց թէ յորժամ ամենեքեան ելանեն զկնի մեր՝ նշան արարէք մուխ։ Եւ թագաւորն դիմեաց ամենայն զօրօքն ի Թերեպն, եւ կարծեցին թէ փախեան, եւ ամենեքեան ելին զհետ նոցա. եւ բերդացիքն արարին զմուխ նշանն, եւ յայնժամ զօրքն առ հասարակ եւ թագաւորն զԱստուած յօ/102բ/գնութիւն կոչեալ դիմեցին ի վերայ Թուրքին, եւ դարձուցեալ զնոսա ի փախուստ եւ յարձակեցան զհետ եւ կոտորեցին ԼԵՌ [35. 000] այր, եւ մեծաւ յաղթութեամբ դարձան ի Կուրիս։ Եւ Բրզուխն եւ Տուշտիկինն գնացին լի ամօթով, եւ հաւատացեալքն Քրիստոսի ուրախացան։ Եւ զկնի աւուրց ինչ Բրզուխն տարաւ զդուստր թագաւորին եւ զորդի Ճօսլինին ի Խլաթ Ճապար, եւ ինքն գնաց ի Մօսլ, եւ զկնի տարոյ մի սպանին զնա շեխերն դանակաւ ի տան նորա, եւ սպասաւորքն նորա սպանին զշեխերն Ձ [80] ոգի։ Ի սոյն ամի ժողով արար ամիրայն Պարսից Պրեհիմն, որդի Սուքմանին արս ՁՌ [80. 000] եւ գնաց յաշխարհն Վրաց, եւ թագաւորն Դաւիթ կոտորեաց զնոսա առաւել քան զառաջինն։ Ի սոյն ամի հանգեաւ ի Քրիստոս աստուածասէր թագաւորն Դաւիթ, եւ նստոյց յաթոռ իւր զորդին իւր զԴեմետրէ, որ եղեւ այր քաջ եւ պատերազմող։ Սա դարձոյց զորդին Մանուչէի ի քաղաքն իւր Անի, եւ բազում երդմամբ արար զնա իւր /103ա/ հաւատարիմս եւ հնազանդս, եւ մեծ երդմամբ հաստատեցին զի մեծ եկեղեցին կաթուղիկէն հանապազ Հայոց լիցի։