Գիրք վաստակոց

Ա՛ռ սոնօպրի մէջ աղնձած, եւ դի՛ր 'ի գինին. զհոտն լաւացուցանէ: Եւ թէ առնու ոք կաւէ աման մի, եւ թէ ճառայ լինի, որ յարակ 'ի մէջն պտղի ձէթ կեցեալ իցէ, եւ կոտորէ, եւ առնու զկէս դեհն ոռիցն, եւ ածէ յինքն ջուր, եւ դնէ 'ի կարասն 'ի գինին՝ որ զերդ նաւ վերագայ, եւ կալնու եւ ծեփէ զկարասին բերանն 'ի վերայ, եւ թողու երեք չորս օր. եւ ապա բա՛ց եւ տեսանես, նա խեցատն զամենայն գիշահոտութիւնն 'ի գինւոյն քարշեալ է եւ 'ի ջուրն փոխարկեալ է: Եւ թէ ճառայ առնուս ուր լնուս ջուր՝ եւ 'ի գինին մխես մինչեւ 'ի շլնին, զնոյն բանդ առնէ: Եւ թէ առնու ոք սպրկիկ կարասի ոռից կտոր հաստ եւ թանձր, կամ կղմինտր, եւ տաքացուցանէ եւ զձիւթն 'ի վերայ ածէ, եռ ընդ եռ զինքն 'ի կարասն ձգէ, լաւացուցանէ զհոտն:

Եւ թէ առանց պատճառի իրիք զոր չգիտենաս՝ հոտի գինին, ճավզպէք տասն կամ այլ աւելի ձգեա 'ի կարասն եւ ծեփեա 'ի վերայ. լաւացուցանէ: Եւ թէ քաղցր խաղողի կամ չամչի կուտ առնուս եւ պահես, եւ երբ սնկիս՝ դու մունֆախդէճով թրջեա եւ 'ի գինին ա՛րկ, զհոտն լաւացուցանէ. եւ թէ ոչ՝ ա՛ռ նուկի մի անոյշ գինի եւ նուկի մի մուռ, եւ երեք նուկի ձիւթ, եւ յիրեար խառնեա հալած, եւ դի՛ր 'ի նոր ձիւթած կարաս մի այլ, եւ ապա զայն հոտած գինին անդ լի՛ց, լաւանայ եւ անուշանայ:

Եւ թէ 'ի պղնձի ամանէ կամ 'ի ժանկահոտութենէ իմեքէ աւերեալ լինի գինին, փոխեա յայլ աման, եւ շող հաց մի եւ երկաթի օղ մի տաք 'ի ներք ձգեա. լաւանայ: Եւ թէ 'ի ծխոյ կամ 'ի ճրագէ խանձրէհոտեալ լինի գինին, ա՛ռ ափ մի ձիթենի փայտի այրուք գործելախառն, եւ սակաւ մի կիր անապակ եւ 'ի ներք 'ի կարասն ձգեա, նա կիրն զձէթն քաղէ եւ գործելին զծուխն: Եւ թէ ձէթ իցէ վայթեալ 'ի գինին, ա՛ռ մեծ սպունգ, եւ զգինիդ ընդ սպունգն անցո. նա գինին 'ի վայր անցանէ եւ ձէթն 'ի սպունգն մնայ: Եւ թէ առնուս ձիւթ եւ հաւկթի դեղնուց, եւ ծեծես եւ ընդ իրեար խառնես, եւ 'ի ներք 'ի կարասն ձգես, եւ պինտ հարուս, եւ առնուս եռջուր, եւ 'ի դրուցէ զկարասին ոռն ծեփես եւ լուանաս, զձէթն եւ զծխոյ համն հանես: