Գիրք վաստակոց

Եւ քան զամէն տնկել՝ փոսերովն է լաւ. եւ թէ տարւոյ մի յառաջ տաս առնել՝ լաւն եւ պատշաճաւորն այն է, որ արեգական ջերմութիւնն եփէ զինքն, եւ անձրեւաց ջուրքն ժողովին եւ արբուցանեն զինքն: Եւ ցամաքային օդքն եւ ձմեռնային սառուցմունքն քրքրեն զինքն. եւ մեռուցանեն զմազմզուկն յայլ ազգ բուսոցն՝ զինչ անդ կենայ. երբ դնես զտունկն՝ նա կակուղ գտանէ զհողն, եւ զմազմզուկն հեշտ արձակէ: Եւ թէ յաղագս տնկութեանն լինի, նա 'ի պակասն երկու ամսոյ պիտի, կամ խիստ պակասն՝ ամսոյ մի անհնար: Եւ բազում անգամ լից զփոսերդ խոտմշով, եւ բռընցո, որ աղէկ այրի. եւ թէ յամէն օր կարես առնել, խիստ լաւն այն է: Եւ զխորութիւն տնկին ըստ գետնոյն որպիսութեանն առնեն. տես զտունկն թէ յիւր տեղն որպէս կեցեալ է, թէ դուր լինի տեղն՝ թիզ մի այլ խորու արա եւ տնկեա, եւ թէ դար՝ երկու թիզ. եւ այսպէս է տնկին փոսոյն սահմանն: