Գիրք վաստակոց

Եւ թէ ուզես որ յամեցուցանես զտունկն՝ թէ ո՛րպէս պահես. են ոմանք որ 'ի գարնանային սկիզբն 'ի փետրվարի եօթն օրն սկսանին եւ քաղեն. եւ են ոմանք որ ասեն, թէ երբ պտկէ՝ լաւ է առնուլ զտունկն. եւ են որ ասեն թէ 'ի սկիզբն: Եւ թէ յամեցուցանել կամիս զտունկն եւ ապա դնել, քաղեա զտունկն եւ զմկրատսն սրբեա յիւրմէ աղէկ. եւ զտունկն շինեա եւ փոս արա, եւ 'ի ներք դիր առանց կապելոյ, եւ թաղեա 'ի հիւթ տեղիսն' եւ 'ի նոյն հողն ուստի առնուս զինքն թաղես, լաւն այն է: Բայց թէ շատ կամենաս պահել, թէ 'ի ներքոյ տանն թաղես՝ այն է լաւն: Եւ օ՛ծ զտնկացուն՝ այս օրինակաւս. զտեղիսն որք սրով կտրած լինին, կեղեւեա զտնկին բարունակին կեղեւն եւ ծեծեա զինքն մանր, եւ զսատապն 'ի միասին. եւ դիր 'ի պտուկ, եւ ջուր արկ 'ի վերայ, եւ եփեա մինչեւ զերդ մեղր դառնայ. եւ ապա օ՛ծ զտնկացուին կտրուքն, եւ պահեա հողով քանի ուզես, եւ տար յերկրէ յերկիր այսու զոր գրեմք: Շինեա զտախտակէ սնտուկներ, եւ ձիւթեա աղէկ 'ի դրուցէ. եւ շինեա արճըճեայ նօսր տախտակ, եւ դիր 'ի սընտըկին ոռն, եւ դիր զտնկացուն 'ի ներքս եւ ամուր փակեա. եւ խծկեա զփակսն եւ ձիւթեա, զի 'ի ներքս օդ չմտանէ, եւ տար քանի կարես. երբ բանաս՝ նոր եւ թազէ գտանես: Եւ են ոմանք որ ծածկեն զտակս տնկացուին այն իրօքն՝ զոր Պօլօնիացիքն կոչեն գետնամօրուք, եւ Սուրացիք ռիպուս. եւ այս սովորական է մեզ եւ փորձով որ լաւ պահէ: Եւ այլ ոմանք զփառային կոթէքն փետեն 'ի գետնէն եւ 'ի վերայ զտունկն ծածկեն, նոյնպէս եւ ներքեւն, նա լաւ պահէ. եւ թէ զնոյն ինքն փառայն դնես: Արդ՝ այս ճշգրտիւ գիտելի է որ տնկին չորացուցանողն եւ ապականողն օդն է. եւ անտի պարտ է զինքն աղէկ պահել, եւ թէ յայլ պատճառանաց թոռմի՝ բաց 'ի հողմոյ, նա օր մի եւ գիշեր մի զտունկն 'ի գնայուն ջուր դիր, եւ ապա հան տնկեա աղէկ լինի: Եւ տես թէ գետինն ուր տնկել կամենաս չորացեալ իցէ, եւ կենայ հնար որ ջրես եւ ապա տնկես՝ լաւն այն է: Եւ որպէս յառաջն գրեցաք՝ խիստ լաւն զոր փորձեալ եմք այն է, որ երբ աղէկ շարժեալ լինի տունկն՝ յայնժամ տնկես: