Գիրք վաստակոց

Գիտացիր որ խիստ աղէկ մեղրն այն է որ յԱդենոյ երկրէն գայ եւ յիւր կղզեացն. նոյնպէս եւ 'ի Սիկիլիոյ, եւ 'ի Կրիտէն եւ 'ի Ֆուկ կղզւոյն: Եւ աղէկ մեղրին նշանն այս է, որ յիստակ եւ խարտէշ լինի, եւ այնպէս լինի որ յիստակութենէն թափ ընդ թափն տեսանես զինքն. եւ երբ մօտիս՝ պտղանդ կոկ թուենայ. եւ երբ մեկնես՝ մեկնի եւ դերձանի, քիլդ որ լարես՝ չկտրի. եւ երբ 'ի բարձրէ վայթես, 'ի քամ եւ 'ի յուշ իջանէ, չկտրատի. եւ 'ի վերայ ամենիդ անուշահոտ լինի եւ անուշահամ լինի: Եւ զայս իմանաս որ շատ դիմանայ. եւ նշանն այն է՝ որ քանի երթայ պնդի, եւ հոտն եւ համն, եւ յիստակութիւնն միապէս մնայ: Բայց կայ որ միապէս սեւանայ. եւ զայս ազգ եւ զայլ վատ մեղրերն՝ պարտ է եփել եւ զըֆրքաղել եւ պահել: Եւ ճշմարիտ է որ ոք զաղէկ մեղր ստէպ ուտէ, երկարի կեանքն. եւս առաւել ծերքն՝ որք սովորութեամբ առնուն եւ հացով ուտեն յամէն կերակրոց վերայ: Եւ հարցած է ընդ Դիմոկրատէս իմաստասէրն վասն ապրելոյ. նա ետ պատասխանի, եթէ մարդ որ զիւր մարմնոյն դուրսն անուշահոտ եղօք օծանէ եւ զներսն անոյշ մեղրով, նա շատ ապրի եւ անցաւ մնայ: