Գիրք վաստակոց

Կամենաս զինքն սատրել, պարտ է ներքեւ կղմինտր կամ սալ դնել, որ գլուխն տափականայ եւ չթողու որ երկայնանայ ընդ գետին 'ի վայր, եւ հողով ծածկեա, որպէս սատրելոյն արժան է: Եւ թէ ուզես որ մեծ գլուխ առնու, ճեղքեա զգլուխն՝ փայտեղէն սրով, եւ շողգամի մէկ հունտ 'ի ներք ձգեա, եւ դարձեալ ծածկեա. նա մեծ առնէ զգլուխն: Եւ թէ այլ մեծ ուզես, երբ ճեղքես՝ շատ քուռաթի հունտ լից 'ի ներք եւ ծածկեա, ա՛յլ մեծ լինի. եւ քանի շատ անգամ առնես, նա խիստ մեծանայ: Եւ երբ նոր սատրես՝ երեք օր մի՛ ջրեր. եւ զիւր փոսն քան զութ մատն խորու չէ պարտ առնել: Եւ ոմանք աւազ խառնեն 'ի հողն 'ի սատրելոյն տեղն, նա զգլուխն մեծ եւ պարարտ առնէ: Եւ այս ա՛յլ լաւ նշան. ա՛ռ զհունտն եւ դրգալ դրգալ ծրարանի արա 'ի հին քթէթ, եւ սատրելոյն չաքօքն տնկեա. լինի ամէն գլուխ քան զշողգամ մի: