Գիրք վաստակոց

Պարտ է զմառանն բարձր առնել, որպէս յառաջ գրեցաք, եւ զդուռն 'ի հարաւոյ դեհն, եւ զպատուհանսն 'ի հիւսիսոյ. նա զգինին յերկար պահէ եւ թեթեւ լինի: Եւ Ասիացիք եւ Շամցիք՝ 'ի մառանսն վերնատունս առնեն, նա լաւ է: Որ ուզես թէ քո գինին քաղցր եւ թանձր լինի, տես որ զբերանն կարասին բաց չթողուս, թէ ոչ՝ հողմն զհոտն եւ զհամն գինւոյն աւերէ: Եւ պարտ է հեռի դնել զկարասն 'ի միմեանց, որ բորն՝ որպէս գրեալ եմք՝ չփոխի 'ի վատթարէն 'ի յաղէկն: Եւ լաւն այն է որ 'ի ներքոյ ոռիցն կարասին սամիթ դնեն, կամ անանուխ կամ այլ տաք անուշահոտ խոտ: Եւ ոմանք փորձեալ են, որ զմառանն 'ի ծխագնաց տեղ պարտ է շինել, մօտ 'ի փուռն եւ կամ 'ի տեղ ուր կրակ բանեցընեն, որ մուխն զգիջութիւնն քաղէ: Եւ թէ անճարակ լինի, նա փիճի կամ մրտենի կամ բեւեկնի մուխ պարտ է 'ի մառանն առնել: Եւ թէ ոք 'ի կարաս ուր քաղցր գինի լինի կեցեալ 'ի ներք, եւ առանց նոր ֆանոսելոյ եւ ձիւթելոյ նոր գինի ածէ 'ի ներք, անհնար քացախի: Եւ թէ յաման ուր աղի իրք կեցեալ լինի 'ի ներք, եւ գինի ածես՝ լաւ լինի: Եւ այլք որք զկարասն ուզեն ստէպ բանալ եւ յամէն վնասէ պահել՝ յառնուլն, նա թող առնուն ծովու ջուր կամ մոխրաջուր, եւ լուանան աղէկ զկարասն եւ սպունգով մաքրեն զատակն եւ զգիշահոտութիւնն հանեն, եւ թէ չելանէ՝ շող ջրով եւ աղով թող լուանան. եւ ապա առցեն գարէալիւր եւ ձիւթ, եւ չորս բաժնին մէկն մոմ եւ հալեսցեն ընդ իրեար եւ ձիւթեսցեն զկարասն եւ թողցեն որ հովանան. եւ ապա խունկ ծխեսցեն եւ թողցեն զի ցամաքեսցին. եւ ապա զգինին 'ի ներք լցցեն եւ սերտ 'ի բան տարցեն: Եւ են ոմանք որ պտղի ձիթի տուրտնով օծանեն զկարասն եւ ապա ձիւթեն. եւ այլք ոմանք են որ ծեծեն զչոր թուզն եւ այնու օծանեն զկարասն 'ի վերայ ձիթին, եւ ապա լնուն զգինին. եւ այս փորձով աղէկ է: Եւ փոքր կարասն աղէկ է քան զմեծն, որ շոյտ շինվի. եւ թէ արատ ինչ անկանի՝ ճարտար ելանէ գինին: Բայց աղէկն այն է որ մենակ զերդ 'ի փռնէն ելանէ՝ ձիթվի եւ լցուի քան զհինն: Եւ թէ բեկի կարասն՝ ա՛ռ ծծումբ եւ կարասկոտոր լեսած, եւ բրտի կաւ, եւ շաղախ արա եւ օ՛ծ զբեկածն. նա քան զանարատ տեղն՝ այլ ամուր լինի: Եւ (թէ) կարասն կամ ապիկի կամ շիշ բեկի, ա՛ռ բուռ՝ որ է ալչի, մաղեա մանր. ձուի ճերմակն խառնեա եւ ծեծեա որ մակարդի, եւ օ՛ծ զբեկածն: